Edukimi dhe aktivizmi

Edicioni i 13-të, i pari i vitit 2015, u mbajt më 31 janar në sallën e konferencave të Orchide-së dhe i kushtohej edukimit dhe aktivizmit.

Lirika Demiri, studente e sociologjisë, foli me temën „Sociologjia përmes fotove”. Prezantoi një seri fotografish të botuara në revista të ndryshme, që tregojnë jetën e përditshme të qytetarëve të Kosovës, kryesisht të komunitetit rom, ashkali dhe egjiptian në Ferizaj.

Shpend Mustafa, student i shkencave politike dhe aktivist nga Ferizaji, foli për „Klubin për Arsim më të Mirë”, një projekt i financuar nga UNICEF-i, që funksiononte nën ombrellën e KNK-së me mbështetjen e Këshillit Rinor Kosovar (KYC). Projekti përfshinte të gjithë aktorët e arsimit të mesëm të lartë dhe nxori rekomandime e studime për përmirësimin e arsimit në Kosovë.

Arbër Kadriu, student i drejtësisë, foli për debatin e strukturuar „Karl Popper”, nga përvoja e tij si debatues që në fillimet e këtij debati në Kosovë dhe më pas si koordinator i klubit të debatit „ACTIVA” në Ferizaj. Tregoi çfarë përfitimesh sjell debati, përvojat e tij brenda dhe jashtë vendit dhe pse debati ka rëndësi për gjithë shoqërinë.

Organizuar nga një ekip vullnetarësh të rinj nga Ferizaji, me mbështetjen e IPKO Foundation.