Arti dhe poezia

Edicioni i 39-të u mbajt më 31 mars 2018 në sallën e konferencave të Orchide-së dhe i kushtohej artit dhe kulturës, me një ekspozitë dhe një libër me poezi.

Arbnor Karaliti, student i pikturës në Fakultetin e Arteve në Prishtinë dhe bashkëthemelues i grupit HAP, një komunitet artistësh që përdorin artin bashkëkohor për tema sociale, foli për ekspozitën e tij „4 minute walk”, të hapur më 16 mars në Galerinë e Arteve në Ferizaj. Ekspozita mblidhte punët e dy viteve të fundit, për gjërat që „s'i ka thënë kurrë dhe s'i ka bërë kurrë”, të shprehura tani në një mënyrë tjetër komunikimi.

Shpëtim Selmani, me master në aktrim nga Fakulteti i Arteve i Universitetit të Prishtinës, aktor teatri, poet, prozator dhe dramaturg, prezantoi librin e tij më të ri me poezi, „Në kohën e gjakut dhe zhgënjimit, 2010–2017”, dhe lexoi disa poezi prej tij. Libri ka tri pjesë dhe një kapitull të fundit, „Letra”, me poezi kushtuar personaliteteve letrare e artistike, disa prej tyre miq të poetit.

Organizuar nga ekipa e të rinjve aktivistë të BarCamp Ferizaj, nën ombrellën e Iniciativa për Progres (INPO), me mbështetjen e IPKO Foundation.